mercredi 12 octobre 2011

هايم في بلاد البهايم حاشا عينيكم


 يا رجال مافهمت كان  حويجة ...فما إنتخابات في 23 أكتوبر ولي لازم تفهموه إلي لازم تمشيو تحطوا الورقة في الصندوق حتى كانك مع المبادرة !!! غير صوت برك وناس الغربة انتوما نهارات 20 21 22 أكتوبر نشالله 
أما فما حاجات مازلت مفهمتهمش وكما العادة إلي ينجم ينورنا مرحبا بيه  

مازال فما تعذيب في السجون التونسية ...وولاد صغار مل فوق 14 و 15 عام 
العودة المدرسية
وزير أول يبرد في وجهو بين  البلدان  
حزب القراصنة يساند الصنصرة  
ملتقى المدونين العرب في تونس ...فما 6 توانسة 
الأمن يخطف في المناضلين جهار في النهار 
إيران تعطي في تعليقات على حرية التعبير   
منقبة تحب تقرا في الجامعة  
المنتخب التونسي ترشح إلى كأس إفريقيا 
تسكير جريدة الصدى  
 إلياس الغربي ولا لاهي بزوجتو  
أسير صهيوني يسوى 1000 فلسطيني 
بشار الأسد يقتل فيها عاري ولابس 
سركوزي يشري في الزرير 
فلسطين في الامم المتحدة " أرجع غدوة " 

وكما العادة إلي يفهم حويجة ينورنا 

شالوم 



samedi 8 octobre 2011

مقص ... ورق ... حجر


 التونسية ،الصدى و كمل نسمة من غير منحكيو على رجوع المبيد وهلم جرا ... يا ناس زمن حرية التعبير معادش يطول 
 
لبارح سي المتصرف القضائي فاق من النوم وخذا قرار بش يسكر قناة التونسية تجي تشوف قرار معقول كي تعرف شكون المنتج متع البرامج ....طيب الذكر سامي الفهري أما يقول القائل شبي هل متصرف توا فهم إلي هذي القناة محقهاش بدات من اصلو ولا خاطر ينبروا بالعالي عل حكومة متع الباجي  

سامي الفهري سارق وقطعي هذي متفاهمين فيه أما كان غلط غلطة متصلحش بغلطة أكبر منها وحرية تعبير أهم من أن سامي الفهري سرق ...خاطر السراق الكبار عايشين في بحبوحة من العيش 
 
صرح كبير فالإعلام التونسي دار الصباح ولا فيه زادة المقص يخدم بعد 14 جانفي وولا الشي جهار ومش مقال أما تسكر جريدة كاملة ...أهوكا حتى مصروف ينقص وتولي صابون على برا في الاذاعات وضرب ومضروب ونطيحو بالمستوى لوطا ياسر وهذا لكل علاش خاطر الحكومة المؤقتة (إلي خذات أكثر من وقتها) ميعجبهمش الكلام إلي فيها وسي المتصرف يجي كل عادة يسكر الحانوت 

وختامها مسك بنسمة إلي بعد معداو فيلم برسيبوليس ولي أصحاب اللحي النيرة والعقول القويمة ماجاهمش على قياسهم وكيما جات في الافريكا توا ولات مقر نسمة مستهدف ... شي يعمل 66 كيف   
 
ونبشر ناس الفيسبوك إلي المبيد رجع كما أيام نوفمبر ... إلي صار عليهم يعرفوا كيفاش يتجنبوه  
 
مقص أصحاب العقول المتحجرة مينجمش يفك ورقة الحرية من يد الشعب !!!!  

 شالوم