كلو من النيل سات

 نبداو على بركة الله بشوية برتوكول ونقلكم كل عام وأنتم حيين بخير ونشالله 2013 يكون عام مبروك على الناس لكل ولو أنو كي سمعت حسن الشارني في شمس أف أم يحكي على الأبراج وقال إلي الأبراج لكل بش يسلكوها في العام الجديد قلت واحد لازم يسايس رحو على ما يواتي 

من هايم في بلد البهايم 6 إلي هو عندو مدة ما كتبتش وقعدت ديمة نسأل في روحي كيفاش بش نرجع بحاجة من غير ما نركب على حتى حدث ومن غير ما نسب حد ولا نتكهن بالإنتخابات الجاية خاطر التكهن بها أصعب من البرموقول 

ليلة 30 ديسمبر في الليل نتفرج في الوطنية 1 في مسلسل حسابات وعقابات (هذاك حال الوحداني) شديت الكوماند وبديت نشوف في التلافز التونسية وبديت ندور...من غير ما نطول عليكم بديت بعد الوطنية 1 حطيت أختها نومرو 2 فما راعنا أن لقيت الوطنية واحد قلت بيني وبين روحي صحيح إلي ساعات تنجم تجيك دبوزة في حانة أكلي مش ولا بد أما هذا ما يمنعش ...برا نتجاوزو 

تعديت على حائط المبكى ولا قناة حنبعل وكل بلد أرطالها ...الحاصل MK وأترك فراغ 

وصلت إلى فريق الدفاع ... قناة التونسية إلي نراو فيها في سامي الفهري مشدود عندو فوق ال 100 نهار وبديت نشك إلي مع سي وزير العدل هذا قناة التونسية معادش بش تلقى فضاء بش تحت أرقام عدد النهارات إلي عداهم سامي الفهري في الحبس 

بين قوسين نحب نأكد إلي إذا مرام بن عزيزة ومحمد علي بن جمعة يسلمو رواحهم للقضاء درجة تعاطف الشعب التونسي مع سامي الفهري تنجم توصل إلى إعلان إضراب عام عير محدود ... ولكم سديد النظر 

وصلت الرحلة ووصلت إلى قناة إعتصام ما سمع به حد TV ولا الحوار التونسي وأهوكا على كيفكم ... نلقى اعتصام في مهرجان متع شعر في الجنوب التونسي خاطر لجنة التنظيم من ازلام النظام ... ويشرولي حتى لجنة التنظيم التجمعية مازالو ما سمعش به التحرك هذا  

برا نزيد لص ... وصلت ال تونسنة يخي حشاكم لقيت مارك دورسال يحكي هو كي تجي تشوف معادش تستغرب منهم حتى شي 

زدنا لص أخر وصلت ال TWT...لقيت محمود ياسين وقتلي هو في اللسي  وجاتني لحظة تأمل إلي شكيت في لحظة إلي مرناق معادش تخرج في سلعة باهية أما قلت يزي يا رجل ماتقول هل كلام 

شعلت واحد Légéres وواصلت المسيرة ... لقيت روحي في  بيت قعاد فتحي العيوني ولا قناة الزيتونة كما يحلو لبائعي المعدنوس تسميتها 

كهو كملت الثنية ووصلت إلى القناة ولات مثال يحتذى لدى France2 و CNN و غيرهم وإلي كل المؤسسات الإعلامية تسعى لتبادل الخبرات معاها ... لقيت بلاتو فيه زوز كراسي متع حجام (و لا نزيد عليكم كلمة ) واحد فارغ ولاخر قعد فيه الشيخ عبد الفتاح مورو و طفل جويد يتسومم عليه وقالو : " الشعب التونسي ... يتهمك بحرق باب سويقة " أنا أول مرة نشوف مورو وجهو أصفر وجاوب " أنا مانيش هوني وقتها صلي على النبي " 

كملت نتفرج في هل المقدم الجويد وهو يطوال ويقصار على الشيخ مورو ...سألو " كيفاش تفسر طرد تونس لسفير سوريا وقتلي لا فرنسا ولا أمريكا ولا حتى الدنمارك لم تفعل ذلك " (إلي فهم على الدنمارك يكلمني فيسع على التليفون ) مبعد كمل لعج عليه " هل ... الجزيرة هي ... قطر ؟؟ " وأنا نشوف في الشيخ مورو حالتو متعبة ...قلت هذي أقوى قناة منذ إنبعاث الأقمار الصناعية 

وفا برنامج "منك نسمع " متع سي الجويد ... تعدينا إلى برنامج قوي ياسر اسمو "من أنتم " قلت برا تبع السارق لباب الدار وتفرجت يخي طلعو يعديو في إصلاحية وعطاو الكلمة للمدير إلي لابس كسوة تقول ديركت Sans Mousse وهو يجلجل بعربية قحة على الإنجازات متاعو ... ومنها حطو قاعة السينما متع الإصلاحية إلي هي عبارة على بيت فيها بنك طويل قاعدين فوق 3 من الصغيرات يتفرج في رواحهم كي صورهم في قاعة الإعلامية ...قلت برجولية هاو  ضرب الصندي ولا لوح 

القناة الأعجوبة في عز الليل تعطينا طرح "الدنيا حكايات " إلي هو يثري المشهد الإعلامي في نوع البرامج إلي ينشرو في الصابون وانجم نأكدلكم إلي رزوقة طلع بعيد كل البعد عن المستوى متع أحببنا ...ما نسبقكمش بالحديث عاد مرة زوالية مع بنتها عمرها 13 عام تحكي على راجلها خلاها ومشى من غير نفقة وتبكي وتمخط حشاكم وإذ بمقدمة البرنامج تقول احنا بش نطلبو زوجك وصار هكاكة 

سي حبيبنا هز التليفون يخي قتلو المقدمة " أنا فلانة من برنامج الدنيا حكايات على قناة الجنوبية " يخي جاوبها " شنوا شنوا شكون...فما شان اسمها هكا ؟ " ما نحكلكمش عاد على الأخت في البلاتو وجها ولا Bleu Marine أما تشجعت وقتلو علاش خليت مرتك هكا مع   صغير مكش مستعرف بيه " ياخي جاوبها "  ماو عملت تحليل ADN وطلعت مش بنتي " يمشيش تقولو خلاتلو ولا بقاتلو وقتلو " إي عاود تحليل أخر " جوبها بكل ثقة في النفس " أيا فك على أمي ... تلعب بيه تحليل ADN انتي أيا بخاطرك  "  وعلق التليفون وحسب ما يشيرولي الزملاء في الحافلة أنا هذا المقطع مرشح في جائزة أحسن نص لجوائز الأوسكار وأن السيد تعقد كي شاف المقدمة ودخل لسبيتار الرازي بيت 351 وبجاه ربي طلو عليه راهو  في حالة  

بعد الليلة المشهودة هذي نحب نقول لناس إلي تقول ARTE في الليل لازم تكون متكيف بش تفهمها ...نحب نقلهم جربو الجنوبية تو تشوفو إلي لازم أعتى وأقوى أنواع المخدرات بش تفهمها 

و نحب نوجه رسالة للحكومة : Legalize It 

شالوم   

هايم في بلاد البهايم 6

غبت  مدة صحيح ... قلت خلي نزيد نتأمل بالك تتحسن الوضعية وتتوضح الرؤية والواحد يفهم راسو من ساقيه لكن هيهات كل يوم نزيد  نشوف إلي ما زلت نرى كان في ضباب 

أنا قلت لازم نشوف أهل الذكر ينجمش فيكم واحد يدلني على الطريق المستقيم و تتحل في وجهي ... خاطر : 

حزب التكتل (و هوني نحللكم المجال بش تفركوهم على حزب السمكة خاطر حشاكم وحشى هل محل  الضرب في الجيفة حرام ) 

كانت تشخر وزادت بف   

سؤال

الحرية لهم  

راشد يخاف مالضحك (يمكن خاطر فمو يعطي فكرة خايبة ) 

ما عادش سالم منهم حد    

الخليفة السادس قال " دكتاتورية ناشئة  " ياخي  زاد لص 

يحبو شكون وراهم كان  بالبندير   

إلي يقول الحق   

نساء  هن أم أشياء ؟؟ 

نسخة مشوهة من دجلة والفرات  

وهاذم مازالو يعانيو  

مو كي تاخو موقف وري إلي إنت ممثل كبير 

هذا رئيس الإكوادور  والمرزوقي رئيس ... دوحي   

وهذا رياضي قديم وطارق ذياب رياضي قديم ... زيد دوحي

بوليس بن علي لم يرحل 

الترويكا تتكلف غالية 

سياسة تجفيف الينابيع  

فما حشاكم الملاريا وزادا  الطاعون  

يخي مش صوابع اليد مش كيف كيف ؟؟   

إختتام مهرجان المدينة  

علاش ما نشوفوش فينزولي في قرطاج   

وزير الثقافة إلي وصل النجمة الزهراء للإفلاس و منع مهرجان الجاز  في طبرقة  

دار الوزير وقلابس نسمة  

ألبوم Gojira 

شهرين من زمان والسوريين يوفاو  ... ستر ربي لينا شماميان هربت    

الجزيرة العربية في القرون الوسطى  

في بلاد درامان تراوري  

وفي بلاد اوكوشا  

حتى جيران متاعنا يعملو الكيف 

محاكمة ستالينية 

لا خمار لا خموري ...

والغشاش لا تباركلو  

2:44  

والمهم والأهم ... خذيت الباك  

قبل ما نبقيكم على خير أهوكا إلي يفهم حويجة ينورنا وله أجر في السماء  

شالوم   

بالحديد والنار

 شيوخ  النهضة والسلفية وإلي يكونو المشهد الإسلامي في تونس حكاو على رمضان صعيب وإلي قال دموي وإلي قال تاريخي و كل واحد ركب على موجة بش يخوف الناس منو  

أنا خممت قلت بالك يحكيو على المسلسلات مبعد قلت مدام عندهم مدة يحكيو على رمضان لازم عندهم فكرة  فتنة وقسمة في صلب الشعب ... كيما  العادة وقتلي يبداو عندهم مشاكل وقاعدين يغرقوا البلاد يخرجو حكايات كيما  هكا ... تي النهضة كاينها  واحد تلعب معاه في الشكبة بعد أربعة ولا خمسة اطراح تفهم لعبو ومعادش ينجم يعديها عليك 

تجي تشوف  ملي النهضة خرجت للتوانسة حفظنا كيفاش يعملو بش يرجعو مواضيع الدين في الواجهة ويضيقوا الحرية الشخصية والعامة ويقمعوها بكل قذارة تحت راية الدين الذي  هو منهم براء   

حرية التعبير استعملوها  ياسر وحكاية المقدسات الناس معادش تجد عليها بعد العبدلية والمهزلة النهضاوية إلي فهم بعدها الشعب التونسي إلي عندو ناس متحبش ديمقراطية أما تحلم بدولة دينية وحبس كبير بلاش حيط كما إيران وكوريا الشمالية وفهمت الناس زادة قداش وزير الثقافة ضعيف ونيتو خايبة ويفقر في الساحة الثقافية إلي هي تاعبة  أصلا   

أنا فتكم بالحديث عاد كي حكاية المقدسات معادش تاكل الخبز ولاو يحكيو على حرية المعتقد بعد إلي ليوم والبارح أول نهارات رمضان (و رمضانكم مبروك ) جحافل من البوليس تسكر في كل محل تنجم تفطر فيه (قهوة ، كسكروتاجي ... ) حقا حقا قلك احنا دولة إسلامية 

باهي يا سيدي  لو فرضنا جدلاً انو  تونس دولة إسلامية هذا مايعنيش اني لازم نكون مسلم وإلا نخرج من هل البلاد ... انتم زادة جاتكم فيبالكم كلام ساركوزي إلي قال يا تحب فرنسا يا أخرج منها  معناها ولينا نشوفو الإنتماء الديني والعرقي بش نحكمو على شخص وكان مايكونش مطابق للمواصفات نقمعوه وننكل به ونجعله عبرت لمن يعتبر  وغازي الباجي يشهد على ذلك  

والحكاية الجديدة إلي البوليس ولا يخدم من راسو خاطر يجي الوالي يقول إلي ما عطاش أمر  بش يسكرو القهاوي وتوا بش يشدو نهارين ولا أكثر في شكون عطا أمر وننسو اللعب إلي فدينا منو اللعب القذر متع الملتحين  

الدين والمعتقد هو شخصي ... كل واحد حر يعبد ربي ولا يعبد حاجة أخرى يوم القيامة بش نتحاسبو  لكل وحتى حد ما عندو الصفة بش يحكم وإلا يقمع في الحياة الدنيا  إلا بسلطان القانون إلي ينص على حرية المعتقد وعلى عدم منع المحلات الجارية من العمل في رمضان  

يا ناس رهو عنا عام ونص واحنا في معركة الحريات  وإلي ضد الثورة هوما  في الحكم يحبو يرجعونا إلي سقف حريات أقل حتى من عهد بن علي ومن غير ما تعملو على السياسيين بش يعاونوكم خاطرهم عمرهم ما يخدم على مصالحنا احنا وعلى تطلعاتنا  ... حرب الحرية كل واحد يربحها في حياتو اليومية حتى لين نوصلو لكل  إلى "Un point de Non Retour"  وقتها إنجمو نحكيو  على ديمقراطية صحيحة  ولازم تعرفو إلي  قوى الردة ماهيش بش تعدي بالساهل  هذا لكل  خاطر حلمهم انو تونس تولي طهران إلي فيها النساء كلهم بالأكحل والرجال تتكلم في التراكن كلو تحت علم الدين 

حربنا لكل ولازم نربحوها وبالحديد والنار 

شالوم وسنين دايمة  

الخرشي والله ما يبان فيه

  وليت ندعي في ربي بش هل الحكومة تفيق نهار وتعمل حويجة تفرح ... أما شي وإلي يعجبك إلي كل يوم يزيد عقيدة وعاملين الخطة متع العادة   

ما سلم منهم حد لا الصحيح لا البراني وكملو بالمضروبين  هاذم معنتها إلي يصليو  حاظر ويعرفو كلام ربي (مش كان هوما  )  

يالي شادد اليوم وزارة وكتابة دولة ولا ولاية راك عبد خرشي وقليل معروف !!!!  

كان وصلت ليوم عندك نفوذ رهو جرة ناس فما منهم إلي مولا الأمانة هز أمانتو وفيهم الي كتبلو ربي بش يرى نهار في تونس بعد بن علي حتى بجرحو وقال الناس إلي بش يصلح البلاد بش يهزوني عند أحسن أطباء في العالم بش ناقف على ساقي المضروبة ونرجع عبد صحيح لا سو لا سوية   

كنتو متخبين ولا مفرتين كي أولاد الحجلة وحسكم ما يتسمعش وحتى حد ما كان يسمع بيكم ... أما بعد ما خرجت الناس هاذم إلي عملتو في عذابهم  صنعة للشارع و وليتو تنجمو تغسلو مخاخ الناس كما تحبو وتلعبو في لعبكم إلي يقزز  

ماكمش عباد ؟؟ هل ترضاه لأختك ؟؟ شي يبكي الحجر ... إلي ساقو  تقصت  وإلي جاتو رصاصة في قلبو ولكلهم يعانيو في الوجايع ويخسرو عليهم بطاقة معاق ... لازمهم كل واحد تمثال في حومتو !!! 

لا وتجي تشوف مخك ياقف  ... القضايا متع الثورة لكل واقفة وتجي تشوف المصابين كي يحبو على حقوقهم يقمعوهم ويمسح بيهم القع     

 وإنت يا ناضلت كيفو لازم تاقف  معاه حتى وإنت مكش في موقع قرار  أما لازم تتحرك وتضرب على خاطرو وتوصل وجعت وتعاون   باللي تنجم خاطر مايحس الجمرة كان إلي يعفس عليها  


وانت ... إي إنت إلي الحاجة الوحيدة إلي تخمم فيها هي شهريتك ومازلت تحكي بلوغة بش ادخلو البلد في حيط ... الشهيد والمجروح أمانة بين اديك ولازم تعاون خاطر من سكت على حق فهو شيطان أخرس !!!  

لازم تعاون وتتحرك وتقف معاهم خاطر توانسة كيفك وماتقعدش تتفرج فيهم يطفاو ما بين يدينا خاطر بلا بيهم راك عمرك ما تشوف روحك تنتقد في رئيس جمهورية وتصوت في إنتخابات للي تحبو إنت ... عيب علينا لكل  

فما ناس بدات تعاون وتخدم بش تنقص التعب والوجيعة على جرحانا تاج رؤوسنا ادخلو معاهم وعاونوهم واعمل الخير وأنساه وأجرك ثابت ... كي تعاونهم تولي قدرك في عينيهم أكبر من قدر رئيس الجمهورية           

نعرفكم ناس كرماء ويديكم  محلولة وتوانسة نلقاو  بعضنا  !!! 

شالوم   

     

Level 2

La Cascade continue...Chaque jour ils enfoncent le clou et s'engouffrent dans la brèche ouverte par leurs Collègues idéologiques 


Après l'appel au meurtre des Grévistes (En Prime Time),Un Journaliste mis en taule pour une photo ceci après des agressions en pagaille sur des Profs et des Journalistes et Des Occupations de Facultés puis des Affrontements armées entre des Groupuscules laissés volontairement sans oublier tout de même Sejnane qui s'est transformée en une Ville du 8éme Siècle (Fallait le Faire les Gars !!!) 


Puis L'Apothéose et l'Incident de Trop...Qui Remet en Cause une Lutte de plus d'un Demi Siècle puisqu'on a ôté le Drapeau de la Nation Tunisienne (On est pas Une République...ça m'étonnerai qu'on le devienne) d'un temple de l'éducation théâtre de la Poussée et du Putch que les Barbus sont en train de Réaliser
Un Drapeau Mis à Terre remplacé par un autre Noir et à portée Religieuse même si une vaillante militante de l'UGET Hospitalisée par La Suite s'est Interposée (L'Agresseur Regarde Iqraa en ce moment...Si Tu Nous Lis) mais le Mal est Fait


Messieurs et Mesdames on peut le Dire ...On Veut Nous Diviser et Exploser le Pays en Lambeaux !!! 
En Un Temps Record (Six Mois) ils sont arrivées avec une gradation assez étudiée parfois d'une précision chirurgicale pour Nous Propulser dans des Débats Diviseurs tout en Fauchant les piliers sur lesquels la Révolte s'est articulée 


Plusieurs se sont rendus compte après Coup qu'ils se sont faits baiser en Votant pour eux en leurs confiant les  Clés du Pays ...Ils Sont Indécis ou Ils Ont été trompés par les Fraudes électorales mais voilà ils savent qu'ils sont incompétents et veulent à tout prix garder cet électorat pour poursuivre la décomposition d'un Pays en proposant leur Projet Moyenâgeux a un pays qui Agonise à tous les étages 


Messieurs Mesdames...Chaque jour un poignard est planté dans le dos des acquis de la Nation pour faire table Rase et faire fonctionner la machine a remonter le temps et sachez qu'ils ne reculeront devant rien pour cet objectif !!!


Il faut que Mesdames et Messieurs vous ayez conscience de la Gravité de la Situation et arrêter avec l'Apathie qui n'a fait que les Renforcer croyant a une Faiblesse et une Peur ...WAKE UP !!!!!!!!!


On est Tous Tunisiens et le Drapeau nous a réuni pour le meilleur comme pour le pire et le perdre serait la Fin de la Tunisie et le Début d'une Décadence pire que celle qui se passe en Libye 


Mesdames et Messieurs que vous soyez de Droite de Gauche,Noir Ou Blanc,Homme ou Femme,Clubiste ou Espérantiste,Metalleux ou Rasta,Chômeur ou Fonctionnaire et j'en oublie...  Il faut taper du poing sur la Table et ni leur Répression ni leurs Branches Armée qui vont nous faire taire et ceci par tous les moyens pacifiques possibles et Imaginables car on joue pas dans la même Catégorie Ils Sont Certes bien Organisées et on doit en Faire de même ...C'est leur Crainte 


Manifestez,Agissez Dans les Rues,Sensibilisez,Dessinez,Ecrivez et j'en oublie car c'est Maintenant ou Jamais 


Ils Sont plus Loin de passer au Level 2 ... Et ça sera La Fin du Rêve pour Nous !!!


Shalom 

قد يفوتنا القطار !!!

اسئل على صاحبك ستغناشي أما الصنعة هي هي !!! 

اليوم بان بالكاشف أنو الطريق طويل ولي عام ونص مشاو هباء منثورا ... ما عملنا شي (كشعب تونسي ) أما الأحزاب عملو كما حبو وإلي لم الفلوس وولا يمد في يدو للطلبة وإلي مزال يلكلك في حكايات معادش يجدو على طفل عمرو 5 سنين (حاشى  عينيكم ) وإلي مزال يحكيلي على القومية وريق فارغ والشعب يستنى في الجديد 

ورينا إلي ناس التجمع خرجو منها سلامات وناس أخرى جابو ميليشياتهم وبداو يخدمو  على الوصول إلى الحكم ومعاهم حشاكم ناس صوتولهم وخانوكم  ووصلونا ال هذا 

عيب يا ناس عيب يا ناس ... ويني حرية التعبير ؟؟ تكسر سينما على فيلم  ومبعد إلي كسر خذاو 100 دينار خطية  

ويني حرية الصحافة ؟؟  رؤساء تحرير في الحبس ولخرين يتضربو جهار نهار 

ويني المحاكمات ؟؟ ولا قلي في إطار تبادل الخبرات لازم نخليو قتلة الشهداء يعلم زملائهم كيفاش يخبطو ولاد بلادهم 

وينو التشغيل ؟؟ مليون بطال  ... حالنا كي اليونان  

وينو الأمن ؟؟ الناس في جامع يدعون للجهاد ويخرجو بالسلاح ومبعد يقلك لا يشكلون خطر وشرذمة ضالة ولغة العادة ...ولاو يخافو من الكرة والبطولة بلا جمهور 

وينو دستور ؟؟ ناس تركرك في التاي واحنا نستناو 

ويني المعارضة ؟؟ ولا قلي قاعدين يخدمو على الإنتخابات البلدية 

وينو الإقتصاد التونسي ؟؟ يمد في يدو الناس كانو قبائل البارح في الإيام 

ويني الثقافة ؟؟ خايفة لا تكون عورة 

اليوم بان بالكاشف إلي عدينا  عام ونص واحنا نتبعو في ناس ما يسواو  حتى مليم (يرحمك يا بريك في هل كلمة ) وإلي الوقت جا بش واحد يتكلم على حقو و-79 الشهداء ال 300 إلي دمهم مزال بين ايدينا !!! ولا تعملو على معارضة ولا على حاكم خاطر الزوز بش يمرمدوكم كل ما فما فرصة خاطر في عينهم تسواو كي الحيوانات ولا يراعيو فيكم لا نساء ولا رجال لا طلبة لا عمال لا صغار لا كبار وبش يقعدو يقمعوقم إلى يوم يبعثون    

كلنا توانسة وكلنا بش نمشيو في العفس كان بش نسكتو وقد يفوتنا القطار وقتها !!! 

شالوم    

نعبر وما نعبركمش

 تي مو نعرفو لكل وقريناها حتى في التربية المدنية في وقت المخلوع إلي الحرية فيها برشة فروع كما حرية الدين والمعتقد وهلم  جرا !!  

وهذا زادة يشمل حرية التعبير والخلق والإبداع (و إلي شاف غير هذا في المكتب يقلي ) 

ما نطولش عليكم ... بعد الثورة فيبالنا رتحنا من هذي أسكت وأهفت وسيب علينا مل الموضوع هذا وقلنا واحد توا تتحل جوانحو ويشوف أمورو 

لكن من جانفي الثورة صار حاجات ما تبشرش بالخير ...و لازم تفهمو إلي الحسابات السياسية وتكتيك شاشية هذا على راس لاخر معادش تاكل الخبز  

بداو (هوما إلي ما يستعرفو كان بماء زمزم ) من الأول في انترنات مبعد تعدينا إلى مرحلة ثانية وهي تخريب أماكن عرض الإبداع في فيلم نادية الفاني (مع العلم أنو إلي كسرو السينما تحكم علهم 100 دينار خطية ) لين وصلنا إلى ما لا يحتمله عقل سليم بعد فيلم برسيبوليس والدعوة القضائية  ضد نسمة ومبعد ولا الوزير الأول يعين مديري الصحف ووسائل الإعلام !!! 

يا عباد ربي كيفاش نحاكم  تلفزة خاطر عدات فيلم معجبنيش ؟؟ كان هكا تو نشكيو بالجزيرة الرياضية خاطر المنتخب ما هزش كاس إفريقيا 

يا ناس راهو اللعب  حراش وحقك في التعبير في الميزان  خاطر كان تحل الباب هذا راهو بش نرجعو للجو متع وقت المخلوع وين الكلمة تنجم تهزك للقرجاني ولا بوشوشة  ويوليو إلي يتكلمو هما صفر فاصل وترجع الوطنية تعدي في العازفات وهمزة  وصل  على مدار الساعة وتولي الجرائد فيها كان حظك اليوم و إعلان وفاة والسودكو والراديو يولي فيه كان سبور اكسبراس ونانسي عجرم ودور الثقافة فيها كان تفاهات 

تعدى علينا دهر بلا حرية تعبير وخلق خاطر الدكتاتور إلي حكمنا قبل يعرف قدرة  الشعب التونسي  ما عندهاش حدود ... ولذا أنا نساند نسمة والمغرب في الصراع القضائي خاطر الماء يجري تحت ساقينا  !!! 

شالوم