في الرابطة الاولى

أنا ليوم تأكدت من حاجة....رجال سياسة متاعنا يتفرجوا ياسر في الرابطة لولا متاعنا خاطر في تضييع الوقت عندهم طاقة كبيرة وموهبة خارقة للعادة 

الحاصل نسمع فل مذياع نلقى حوار على العقد الجمهوري إلي هو فكرة مش بطالة حتى طرف أما بش تشوف قداش ناس السياسة يعشقوا تضييع الوقت قاموا وقعدوا وحلو نقاش على فصل إلي يحكي على التطبيع معناها فكرة من ذهب كما هل عقد أما نوقفوا فل محطة هذيكا

اش قلك اش قال عليك بش يحطوا فصل فيه تحريم تطبيع مع إسرائيل ...شوف موسع بالهم !!!!

برشة ناس تو يقولوا هذا كل تدوينة يكتب "شالوم" ومش عاجبتو حكاية التطبيع أكيد رهو صهيوني...أما بزهرهم معنديش وقت ليهم 

نتصور إلي هو حاجة زايدة ياسر خاطر  عنا ما أهم توا لازم نتلهاو بيه ونزيدكم زيادة إلي انا عمري ماشفت بلاد بش تعمل دستور ولا حاجة تشبهلو وتحكي فيه على السياسة الخارجية وكان ريتو العكس نوروني

مو هل ميثاق باش يولي عندو وزن نهار أخر...انا نتخيل مثال كان يجي حزب مل 80 ويوصل للحكم ويقرر يعمل تطبيع مع إسرائيل أية شنعملو وقتها؟؟ إنفخوه الميثاق ونشربو ماه؟؟؟ 

احنا مع فلسطين أما متنجم تفرض على حتى مواطن تونسي بش يخمم كيفك وهذي عندها إسم يا محكمة عسكرية و اسمها حرية التعبير إلي هذي لزمها حوار بالحق ولازم طاولة وكراسي وموائد مستديرة و مربعة ومثلثة(متع الماسونيين) 

  

أنا بديت نشك إلي فما جماعة من لجنة تحقيق الأهداف الثورة عندهم هواية متع تضييع الوقت في تفاهات متزيد للتونسي حتى شي

وهاني ندعي باش ميصفيونش ولاد الحلال متع فايسبوك 

شالوم