2 هذا حال إلي يعمل على راجل نديد إليزابيث

 إلي خفنا منو طحنا فيه...نهار 24 جويلية باش تعوم فيه وتسكرو فيه وتحوسو فيه أما مكمش بش تنتخبو فيه خاتر اللجنة إلي لاهية بالانتخابات شافت إلي منجموش نوصلوا نعملوا الإنتخابات في جويلية    

نتصور حمة الهمامي راهو أكثر انسان فرحان توا ويقول جاو لكلامي وغيروا إلي حبوا يبدلوا وقت الانتخابات راهم فرحانين ...هو كي تجي تشوف حكاية وقت الإنتخابات وتوخيرها تكلم عليها نجيب الشابي وتوقع السيناريو إلي صار توا

أنا نستنى في تفسيرات بش نفهم هل قرار إلي بش يدخل البلاد في نفق الله وأعلم وقتاش بش نخرجو منو ...أنا فهمت إلي حكومة الراجل إلي خلط على معاهدة الحماية قاعد يتمنيك على الشعب وفيبالو إلي حكاياتو يضحكوا ووقتلي يسب صحافيين في وجوهم حاجة باهية  

فهمنا إلي هل حكومة متسلح حتى بفرنك واللي ناس بورقيبة وبن علي معادش عندهم بلاصة في بلادنا يا يشدو الحبس ولا يشدو ديارهم   ...خاطر ماناش بهايم ليهم ومش خاطر سكتنا على القمع والضرب وعلى قصان صفحات الانترنت وعلى تحركهم إلي ماجاب شي جديد لا بن علي ولا فلوسوا ...وحد مايقلي إلي كلو مل راجحي خاطر كلاموا قالو نجيب شابي وغيروا والحكومة متكلمتش

يا شياب يلي أكل عليكم الدهر وشرب...يصلح رايكم رجعوا الإنتخابات في وقتها لا ترسلكم تتحاكموا نهار اخر مع رموز الفساد يلي ماعندكمش شرعية رانا معادش نخاف لا من العصا ولا ملقمع وتجبولنا الصيد ولا رامسفيلد 

في يدكم فرصة بش تخلو البلد تمشي على السيراط...انتوما فاشلين في كل شي خليو الإنتخابات في جويلية وإستقيلوا يهديكم

شالوم           

في الشهيق و النهيق

المرة هاذي بش نبدا بشكر سي هيثم المكي (أكبر مني قدر وقيمة) إلي في مدونتو جاوب الناس إلي عرفوا حاجة فل فايسبوك اسمها صفحة  وكيما تعرفوا إلي ولا عنا رياضة جديدة اسمها الركوب عل ثورة ...كهو عاد دخلوا هل أدمنات يصفيو في حساباتهم ويلعبوا بعقولات ناس لا حول ولا قوة ناقصين معلومات (نعذرهم خاطر كي نشوف إلي تقدم في أخبار تونس نقول بلاش بيها) وكي تشوف وزيرك الاول يوعد بش سي السناوي يخبرنا باللي تعمل فيه الحكومة ومبعد ماتسمع شي تقول هلي شادين الصفحات واللي هوما مهمش أذكى من الاعضاء لاقين راحتهم  ويغسلو فل مخيخات إلي فرغها المخلوع واللي ولا يتعدى عليها كل شي

تفرجوا فاللي بش يقولوا هيثم المكي الراجل بش يخرج من سينتو خاطر شي مينطاقش...الرجل لصقولو التهم لكل لين الشي ولا يضحك 

كان إلي يشرفوا على هل صفحات إلي يخرجوا في معلومات غالطة وقاعدين يسبوا ويصفيو في حسابات ويردوا ناس مدونين خدموا وفما منهم شكون حتى توفى كي زهير يحياوي شلايك حشى هل محل يرحمو ويحبوا الناس تخرج تكسر وتضرب إنجموا نجيبوهم أما إلي غايضني هوما الناس إلي مايعرف كان ينقلوا فالكلام متع هصفحات وكي يشوفوا المحكمة العسكرية تسكر  هل صفحات تزيد تخرج هلي ميتسماوش ابطال وتقوى نظرية المؤامرة عند المواطن العادي خاتر تسكير صفحات ومدونات فيبالنا وفا في وقت زعبع

يا ناس مش المدور كلو كعك...ديمة حاولوا ثبتوا وانا كيفكم خطرني لا ادعي في العلمي فلسفةً راهو هاززنا تيار الله وأعلم وين بش نوصلوا بيه...ومنحبش نرى ناس كما قال الفرنساوي مرة (Le Réflexe prime devant la réflexion)  

أيا شالوم (ومانيش بش نبدلها وقولوا عليا صهيوني كي طارق المكي)    

في حضر الجولان

الناس لكل تعرف إلي عنا شرطة تمثل هيبة الدولة كان في شارع حبيب بورقيبة ممكن خاطر يحبو يخلو تقاليد القمع معا إسم بورقيبة...سي الباجي إحترم إسم القدوة متاعو !!! نفهم زادة علاش البوليس يضرب كان في شارع الحبيب بورقيبة ماهو وزارتهم غادي وخايفين على خنارهم لا يخرج و يمشو فيها زيزي
إليوم وصلنا الى حضر جولان في تونس الكبرى والشي مشي على قدام
نفهم الناس إلي خايفة على راس شهر متلقاش شهرية كان الإعتصمات وقصان الكياسات يتواصل وتجي مع الشرطة إلي تضرب في الناس كيانهم زوايل تقول يعسو على سانية (قلي عاد وزيرهم فلاح) والأدهى والأمر هو الإعتذار للصحفيين فقط ونساو الناس فبالهم بهيم قصير مينجمش يتكلم ويخو موقف
أما نفهم التونسي عندو يحب على كرامة (إلي خايفين على الشهرية عندهم كرامة زادة) وحتى حد مينجمش يمشي فوقها والمظاهرات خرجوا صحيح فيهم سراق أما كي تجي تشوف وحدك تلقى إلي كن مش شرطتنا العزيزة إلي ماشدثهمش وقتلي هربوا مل حبس راهوا التكسير نقص...نسمع عقيد في القناة الوطنية يقول إلي عنا أعوان متكونين كان على طرق بن علي نقول وينو دورك بش تفهمهم إلي بن علي مشي واللي الضرب معادش يوكل الخبز ...
المظاهرات ضد حكومة الباجي في كل بلاصة ولذا حضروا رواحكم بش يرجع حضر تجول في تونس كاملة

يقول القايل علاش هذا لكل توا...خاطر فرحات الراجحي قال إلي قالوا ؟؟ أنا نقول إي ولا فرد وقت وهاو علاش

كلام سي فرحات مش قرأن واللي تحليل ميلزمش الناس لكل أما كي تشوف واحد كيف كمال اللطيف مايشكيش تقول فما صحيح فالحكاية
وزيد مل فوق عمل الحكومة (نحي منهم زوز ولا 3 وزارات) مهوش مخلي الناس تشوف في حوايج تبشر بلخير وماشين ونحسوا إلي ظل المخلوع مازال...ووقتلي تشوف وزيرك الأول لاهي بهيبة الدولة ونسي ذهبيبة الدولة وكي تشوفو لاهي بجماعة التجمع وكيفاش بش يرجعوا للحياة السياسية تقول لازم يفيقوا ولا يمشيو على رواحهم
فرحات الراجحي قال إلي عندو ولو انو معرفش يغلف كلامو بشوية أساليب متع وقت بن علي أما زادة احنا في وقت حرية تعبير وفما قانون يحكم مش الغاز يحكم ولازم نفهمو إلي الحكومة لزم توضح برشة حاجات بش نعرفو على شنوا قادمين

أيا شالوم وردوا بالكم على رواحكم