samedi 24 septembre 2011

دواء كحة

تي ماو في تونس نقول فلان "يكح فالفلوس" ...أيا مالا عندي لكم بشارة أما مانحب  حد يبيضلي كفي خاطر لكلنا مبلعين في الديون للعنكوش ....

تي فهمتوني من غير منطول عليكم حكايتنا ليوم على الديون وهل الدكتاتورية الجديدة إلي هي أخطر من سرقة متع أل بن علي واتبعوا أما يقول القايل علاش ؟؟ (مش إشهار متع الزبدة) 

تعرفوا إلي من وقت بورقيبة بدينا ناخذوا فالقروضات وتواصل الشي مع بن علي لين وصلنا إلي خلاص الديون يكلف شحم إيهود وهل الديون معملنا بهم حتى شي تقريباً كن مش لكلها مشات في سرقة و غيروا 

أما يا رسول الله كيف نشوف ألي ناس جاو الله وأعلم كيفاش يمشو ياخذوا في فلوس من عند ناس إلي فهموا ألي وقيت بش يخلصو ديونهم   مش تضهرلكم تغشينا على طول الخط واللي بش ندخلو في دوامة متع خلاص ديون ما لها حل كان إكتشاف ابار بترول كبار واللي منخبيش عليكم صعيب شوية 

أنا خوفي إلي نعيشو أكثر من طاقتنا لين ضهر البهيم حشاكم يوفا وندخلو عاد في سيناريو إغريقي إلي تشوف فيه خدامة على برا والشهرية تتقسم على 2 ويدخلوا الدول الشقيقة والصديقة ربي يفضلهم وينزلوا فينا ركبة !!!

كان مش ليوم رهو غدوا وقبل ميفوت الفوت لازم ناقفو وقفة جدية (مش سلمية ) بش نوقف النزيف خاطر لكلنا نعرفو إلي ماناش خير من ناس اخرين تلهاو يخدمو ويخلصوا في دينهم خايفين لا يفلسوا !!! 

مجلس تأسيسي جاي ولازم حكاية الديون تكون محورية خاطر بل بيها بش يجي نهار ونلقاو رواحنا في التسلل ووقتها معادش فما حل ...نعرف إلي في الدستور متنجمش تنص على معطيات تقنية أما إلي بش ننتخبهم لازم يلقاو طريقة بش يحطوا حويجة في الدستور ألي تلزم أي حكومة بش متمدش يدها للغير ومترصلناش نكحوا في فلوس مستنفعناش بها قبل ...خمم في صغارك وصغارهم   

 أيا شالوم (و قولوا صهيوني )

Aucun commentaire:

Enregistrer un commentaire