جوجما

 أنا ديما  نقول إلي تعدى 2011 سلامات ... ولا ملقح قدام  أي كارثة !!! 

كوارث كوارث كوارث ... محمد الغنوشي مثلاً إلي الرجلة متاع قعدت في القرن 20 (أهوكة باهي معاك  ) ...زلزال فوكوشيما إلي رد أي ياباني ينجم يتحول إلى أنبوبا متع كوجينة ...الشهداء الي طاحو ولتوا لا خذاو حقهم ولا شافو بلد كما تمناوها ...مشاركة الترجي في اليابان  (لازم تنبيرة ) ... كوارث ؟؟ إي بابا نزيدك ... الهاشمي الحامدي يغني في التعليلة ولا مورو يغني بالألمان في حنبعل ... السيدة العقربي ... الترويكا (حاجة فرشكة ) ... لجنة الإنتخابات وحادثة العريضة ... أزمة اليورو (و إلي عندو دوفيز يمشي يبدل فيسع ) .... موت العقيد (حبيت على محاكمة أنا)... كوارث إي خويا كما وعي السياسي متع الشعب التونسي ... سمير الفرياني ... حزب التحرير إلي مايعرف كان يكسر سينما ولا مقر قناة (لا سامحوني طلعت فزاعة )... المحاكمات العسكرية للمدنيين ... كارثة كبيرة زادة هو احزاب اليسار (حتى الهاشمي كمل قدامكم ) ... بسيكو م (إلي ضحكولو  تمد على طولو ) ... الاعلام التونسي (ولو أن صوابع يدك مش كيف كيف ) ... جمال العتروس رئيس النادي الإفريقي 

دومينيك ستروس كان (توا حتى كان جات زبور هذي ديالو ) ...فوكوشيما والنووي  ... إيه تفكرت هاذي قلك استفزاز مشاعر الشعب (هاذي متع كعبة كوديا ) ، محاكمات القتلة والمفسدين (برجولية صدى المحاكم قبل في الصباح أكثر جدية ) ... التعذيب مازال والاستعمال المفرط للقوة (بش منقولش يفشخو فيها عاري و لابس ) ... التشغيل والتنمية (ما نجمش جاتني غصة  ) ... ياسين العياري (هو ودفاع الترجي فرد مستوى  ) وأكبر كارثة هي الاشاعات التي تفنن التونسيون  فيها      

يزي بلا نكد ونتعداو للضحك ... 2011 برهن أن الشعب التونسي من أروع ما تخلق في التفصيص بعد إلي إنتخب العريضة وزدم على صفحة اوباما في الفيسبوك وعندو وزير خارجية اسمو بوشلاكة ، ووزير تعليم عالي كما منصف بن سالم وكيفاش نحكيو على ضحك ومفاجئة سارة من غير مانحكيو على جلال بريك ومحمد الطالبي في شمس وتوفيق بن بريك وناس الفايسبوك إلي عداو عام من أحلى ما ثما ... نزيدكم بعث القناة وطارق المكي وخميس بوبطان وغيرهم !! كما اكتشفنا ناس كما جوهر بن مبارك وعبد العزيز المزوغي ومحمد عبو وصلاح  الجورشي ورياض بن فضل ،مايا الجريبي  (نحكي على عامة الشعب ) وناس كما هيثم المكي ، عزيز عمامي وسليم عمامو وسفيان شورابي وفاطمة رياحي وغيرهم ولات كلمتهم مسموعة وبلدان عربيات ولات حرة  

2011 مش الشكارة و البحر فيه حاجات باهين ... جاو ناس قماقم كيما  Wax Tailor ، Ibrahim Ferrer Jr ، Yossou N'dour Souad Massi وغيرهم 

إكتشاف سي لمهف (ولو أن لم ينتظر 14 جانفي) كيفو كي بديعة وبندير مان وياسر جرادي ورجوع برزخ وولينا نشوفو في ناس كما أهل الكهف و-Zed على سبيل الذكر يخدم في خدمة تعمل 66 كيف !! 

وماننساوش وصول الافريقي إلى نهائي الكاف ب-14 لاعب ... معجزة وحصول تونس على الشان والكان متع كرة السلة و-48947984 مدالية في الألعاب العربية وأنس جابر في Roland Garros  هذا لكل بفضل العناية الموصولة والنظرة الثاقبة  لسيادة  الرئيس 

هذا عام ونشالله إلي بعدو خير ... شالوم